00:00 07 мая 2010 г.
Тăван çĕршывăн Аслă вăрçинче çĕнтернĕренпе 65 çул çитнине уявланă май Чăваш Республикин Министрсен Кабинечĕн ака уйăхĕн 30-мĕшĕнчи йышăнăвĕпе Тăван çĕршывăн Аслă вăрçин ветеранĕ е инваличĕ хăйне илсе çÿрекенпе пĕрле 2010 çулхи çу уйăхĕн 12-мĕшĕччен республика территорийĕнче чукун çул, шыв, автомобиль (таксисĕр пуçне) транспорчĕпе тÿлевсĕр çÿреме пултарать. Вырăнти влаç органĕсене çак категорири çынсемшĕн тата вĕсене илсе çÿрекенсемшĕн тÿлевсĕр çул çÿрев йĕркелеме сĕннĕ. Унăн тăкакĕсене республика бюджетĕнчен саплаштараççĕ.
Тÿлевсĕр билет илме Тăван çĕршывăн Аслă вăрçин ветеранĕн е инваличĕн удостоверенийĕ тата паспорчĕ, ăна илсе çÿрекенĕн хăйĕн паспорчĕ кирлĕ. Республика территорийĕнче çÿреме тÿлевсĕр билет илнĕ чухне пĕр-пĕр ыйту сиксе тухсан е кассăра билет пама килĕшмесен Чăваш Енĕн Стройминĕн транспортпа тивĕçтерекен штабĕнче 8(8352) 54–05–00, 62–10–31, 62–05–59 номерсемпе, çĕршыв хулисене кайса килес текенĕн çак ыйтăва Раççей Транспорт министерствин 8 (495) 626–11–61 номерĕпе шăнкăравласа уçăмлатма пулать.
ЧР ПА пресс-служби.