27 мая 2008 г.
Мучар шкулĕнчен кăçалхи вĕренÿ çулĕнче 11 çамрăк 11-мĕш, 14 ача 9-мĕш классенчен вĕренсе тухаççĕ.
Вĕсенчен нумайăшĕ хăйсем çинчен ырă йĕр хăварса шкул историне кĕрсе юлать. Елена Беловапа Катя Демина чылай предметпа лайăх вĕренсе пычĕç, районти, республикăри олимпиадăсене хутшăнса палăрчĕç. Николай Шмыков, Красновпа Карлов Алексейсем, Евгений Меркушин спортпа питĕ туслă, тĕрлĕ ăмăртусенче хутшăнса шкул чысне тивĕçлипех хÿтĕлерĕç. Женя вара технологи предмечĕпе республикăра та палăрма пултарчĕ. Тăххăрмĕшĕнчи Елена Муханова, Ангелина Жаркова, Аня Феклина республикăра ирттерекен олимпиадăсенче пулчĕç.
Шăматкун шкулти “Юлашки шăнкăрав” уявра ачасене район администрацийĕн пуçлăхĕн çумĕ В.Шакров, шкул директорĕ В.Смирнова, педагогика ĕçĕн ветеранĕсем Б.Мурзин, З.Бахмутова, ял поселени пуçлăхĕ О.Шакшина, управляющи канашĕн членĕ Н.Коровина, ашшĕ-амăшĕсем ăшшăн саламларĕç.
Источник: "Ял ĕçченĕ"