19 мая 2008 г.
Майăн 14-мĕшĕнче Манчестерта УЕФА Кубокĕшĕн Санкт–Петербургри “Зенитпа” Шотландири “Глазго Рейнджерс” тĕл пулнă. Вăрах вăхăт шута нихăш енĕ те уçма пултарайман. Çавах та вăйă вĕçленесси 10 минута яхăн юлсан, А.Аршавин лайăх пас кăларса панипе усă курса Денисов шута уçнă. Çавăн хыççăн шотландецсем тăтăшрах йăнăшма тытăннă. Хушса панă вăхăтăн юлашки минучĕсенче каллех А.Аршавин хапхапа паралеллĕ тапнă. Мечĕке Петербург командин çурма хÿтĕлекенĕ К.Зырянов хапхана ăсатнă. Çапла “Зенит” 2:0 шутпа çĕнтерсе УЕФА Кубокне çĕнсе илнĕ. Çак вăййа “Зенит” çÿллĕ шайра, çĕршывăн пĕрлештернĕ командин шайĕнче, ирттернĕ. Ахальтен мар командăна та, унăн тренерне Дик Адвоката та Раççей Президенчĕ Д.Медведевпа В.Путин премьер çĕнтерÿпе саламланă.
Букмекерсем малтанах çĕнтерес шанăç (60)) “Зенит” енче пулнине палăртнă.
Источник: "Ял ĕçченĕ"