25 апреля 2008 г.
Пысăк савăнăçпа тулчĕ çак кунсенче Йăнтăрчăри Шаймановсен килĕ. Çар службинчен яла вĕсен ывăлĕ Андрей отпуска таврăнчĕ. Борис Гурьевичпа Ирина Анатольевна пилĕк ача пăхса çитĕнтереççĕ.
Андрей ялти шкулти виççĕмĕш класра вĕренекенсемпе тĕл пулу ирттерчĕ. Ачасемшĕн старшина чăн-чăн паттăр пек туйăнчĕ. Вăл Лăпкă океан Тинĕс флочĕн "Пересвет" карапĕ çинче службăра тăрать. Каччă хăйĕн хĕсмет вăхăчĕ мĕнле иртни, салтака юрăхлă пулас тесен çирĕп сывлăхлă, спортпа туслă пулмалли çинчен каларĕ, лайăх вĕренме сунчĕ. Вĕренекенсем моряк çинчен куç илмерĕç, нумай ыйтса пĕлчĕç. Арçын ачасем вара моряк-десантник пулма ĕмĕтленчĕç.
Источник: "Ял ĕçченĕ"