01 ноября 2019 г.
Нумаях пулмасть Михаил Игнатьев та Тăвайри культура çурчĕ умĕнче ĕçлекенсемпе, вĕсен харсăрлăхĕпе çывăх паллашнă.
Кунти лапама хăтлăлатассипе пысăк проекта пурнăçа кĕртеççĕ, пысăк сумма уйăрма палăртнă.
Икĕ тапхăрпа пурнăçа кĕрĕ проект. Пĕрремĕш ĕçе Чăваш Республикин Пуçлăхĕн грантне тĕпе хурса пурнăçланă, 6 млн. тенкĕ укçана Тăвай районне Чăваш Республикин Пуçлăхĕн Указĕпе килĕшÿллĕн 2018 çулхи ĕç кăтартăвĕсене шута илсе уйăрса панă. Скверта çынсене çуран çÿреме ятарлă çул, электричествăпа, шывпа тивĕçтермелли объектсене çĕнетсе тума плана кĕртнĕ.
С.Грабовенко предпринимателĕн организацийĕ ĕçлет скверта. Пĕчĕк плиткăсене, Чăваш Ен эрешне сăнарласа вырнаçтараççĕ. Юпа уйăхĕнче пуçланă культура çурчĕ умĕнчи ĕçсене. Чÿк уйăхĕ вĕçлениччен хăйсен палăртнине пурнăçласа пĕтерме тĕллев тытнă. Сăн ÿкерчĕк пичете тухнă çĕре эреше ăсталаса пĕтереççĕ те, тен, вĕсем.
Çитес çул фонтан, сцена, Тăван çĕршывăн Аслă вăрçинче Çĕнтерÿ тунăранпа 75 çул çитнине палăртса, çĕнĕ палăк туса лартма пăхса хăварнă.