29 августа 2014 г.
Кăçалхи утă уйăхĕн 21-мĕшĕнче федерацин "Раççей Федерацийĕн саккунĕсен хăш-пĕр актне улшăнусем кĕртесси çинчен" 277-мĕш саккунне алă пуснă. Уголовлă кодекса "Саккуна пăхăнмасăр каснă йывăçа сутас тĕллевпе туянни, упрани, пĕр вырăнтан тепĕр çĕре турттарни, унтан каскаласа ăна-кăна туни е сутни" ятлă 191.1 статья кĕртнĕ.
"Саккуна пăсса вăрманти йывăç-тĕме каснăшăн тата "Вăрман йывăç-тĕмне пĕтернĕшĕн е сиенленĕшĕн" (260 тата 261 статьясем) пăхнă штраф виçине пысăклатнă. Административлă право йĕркин кодексĕнче унăн виçине вăтамран икĕ хут ỹстернĕ. Халиччен уйрăм çынна саккуна пăсса йывăç кассан е ăна сиенлесен 3-3,5 пин тенкĕ штрафланă пулсан, малашне вара 4-5 пин тенкĕ тỹлеттерĕç. Саккуна пăхăнмасăр касса хатĕрленĕ йывăçа е сутас тĕллевпе туянсан, упрасан 5 пин, должноçри çынна 20-40 пин тенкĕлĕх штраф хурĕç. Уйрăм предпринимателе 20-40 пин тенкĕ тỹлеттерĕç е унăн ĕç-хĕлне 90 талăка чарса лартĕç. Юридици сăпачĕсен 250-500 пин тенкĕ тỹлеме тивĕ е ĕç-хĕлне 90 талăка чарса лартма пултарĕç.